محطات صغيرة … بقلم: عثمان عابدين .. حل جهاز المغتربين يا مانيس
محطات صغيرة … بقلم: عثمان عابدين .. حل جهاز المغتربين يا مانيس
كشف الأمين العام لديوان الزكاة مولانا أحمد عبدالله مساهمة الديوان في علاج جرحي ومصابي ثورة ديسمبر المجيدة بمبلغ ( 000 ، 944 ، 14 جنيه ).وقال الأمين العام لديوان الزكاة خلال لقائه منسق عام مبادرة حاضرين ناظم سراج (الديوان لن يدخر جهداً في هذا الجانب حتى يتعافى جميع الجرحى والمصابين ” انتهى الخبر”
نعم نحن فى ثورة حقيقية .. والبلد تشهد تحولات كبرى ..ديوان الزكاة على الخط .. مرحبا بهذا الفيض … ” البشير فى الاصلاحية … ووداد فى سجن النساء … وكل الطيبين فى كوبر”
وبهذه المناسبة اعتقد ان تنظيف حوش الديوان ” من المنتفعين والمتبطلين والذين ربما تربحوا منه واجب وهذا دور الوزير مفرح ودور مولانا احمد عبد الله .. خضت ذات مرة معركة شرسة ضد ما يسمى بزكاة الراتب اذ رفضت دفعها لانها ليست واجبة على لان مرتبى لا يحول عليه الحول وهو موزع على العلاج والايجار والتعليم ” والاكل والشرب” والمصاريف اليومية والسفر للسودان فى الاجازة وما الى ذلك
كان رفضى هذا معلن فى مبانى ” جهاز سلب المغتربين” .. حولتنى الموظفى الى ” بتاع الزكاة فى الديوان” وكان كل خلق الله يحنسون فيه. عليك الله اجل لى بدفع شىء واخلى شىء .. وهو ينهر ويبرطم .. ويوعظ بفضائل الزكاة ولانها تطهر المال” وما اختلفنا”
الموظفة .. صوتها كان مقروشا .. لكنها رفعت عقيرتها قائلة: يا شيخنا الزول دا قال رافض يدفع الزكاة ” انبهط ” الشيخ اول مرة” لكنه انتفض وزار فى وجهى قائلا: صحى الكلام دا؟
قلت له: اى صحى ما بدفعا حتى لو عندى لانها ما واجبة عليا؟
قال لى : زمان المرتدين رفضوا دفع الزكاة فحاربهم خليفة رسول الله حتى تابوا وقالوا الروب ودفعوها ورجعوا للاسلام الصحيح
قلت له: مولانا صلح كلامك .. انا ما ارتديت واحد ..اتنين انا سالت كبار العلماء فى البلد الانا فيها مهاجر وقالوا ما واجبة عليا لان فيها نصاب وشروط للصحة
قال لى : هم علماء ونحن علماء واجتهدنا اذا اصبنا لنا اجران واذا اخطانا فلنا اجر
قلت له : طيب انا وضعى من الاعراب شنو ادفع وبس . وانت تؤجر وتثاب باعتقادك على حسابى انا .. لا يا شيخ ابيت ما بدفع
قال لى : طيب كده ما حتسافر مافى تاشيرة خليك قاعد فى البلد دى مع اهلك وذويك ” قلت له فى سرى” يزوز بيك تيتل”
انبرى لى احد ” المسهلاتية ” قال لى يا شيخنا ما تدفع عشان تتخارج ونحن نتخارج ما تعطلنا .. قلت له: مانى دافع وما على كيفو والفتوى موجودة وما يجتهد فينى انا
الشيخ قام بحركة بهلوانية بطرد كل المراجعين ” ليتفرغ لمشكلتى .. بدا الحناسة ” طيب ادفع لينا شىء وناجل ليك .. قتا ليه ابدا لن ادفع ولن انهار .. قال لى حاجة بسيطة : قتا ليهو ابيت: قال لى 100 ريال يا زول ما كتيرة: قت ليهو انا فى المبدا قال لى : طيب فتح الباب وادخل المراجعين ونهرنى قائلا: امشى ادفع جزء منها وما اشوف وشك تانى ووقع على ورقى : تؤجل : قتا ليهو الزكاة بتؤجل قال لى فى حالات يلا امش رووح
هذا سبب وجيه لان يلغى امين ديوان الزكاة زكاة الراتب اذا كانت سارية المفعول … وسبب وجيه ان تحل الحكومة جهاز شؤون العاملين بالخارج وسبب وجيه لارفع الكرت الاحمر واطالب ببل وحل جهاز المغتربين الان وان يرجع كل موظف لمصلحته .. وسبب وجيه لارفض رحلة الجهاز التى ينظمها الان ” كسياحة” لاولادنا ليتعرفوا على بلدهم … يا اخى قوم لف بعيد .. اولادنا هل اتوا من كوكب اخر؟؟ قال بورتسودان قال … يجب اخضاع الامناء السابقين للتحقيق والمساءلة والنظر فى شركات الجهاز ومؤسساته واداراته الهلامية وحله وبله الان .. وبالقانون بلا جهاز بلا لمة… لان لا فائدة منه ولا رجاء “
