موكب للراستات ظهر اليوم دعوة للمدنية الكاملة و الإحتفاء بالتنوع
الإعلان عن موكب للراستات ظهر اليوم دعوة للمدنية الكاملة و الإحتفاء بالتنوع
الخرطوم:سوداني بوست
أعلنت صفحة تجمع راستات السودان ، على موقع التواصل الإجتماعي الفيسبوك ، عن تسيير موكب تظاهري اليوم الإثنين الساعة ١ ظهرا ، بتوقيت الخرطوم.
ونشرت الصفحة بيانا تحت إسم (بيان الراستفاريا) وفيما يلي يورد (سوداني بوست) نص البيان:
بيان الراستفاريا
حلم شهدائنا ما بموت
حلم مليان حب و حياة
حلم لمستقبل مبدع سعيد
حلم لسودان يسع الجميع
نحن راستات السودان نعلن عن تمسكنا بالثورة السودانية وصولاً للمدنية الكاملة و الاحتفاء بالتنوع، الحب و قبول الآخر عبر الفن و الإبداع و كافة الوسائل اللاعنفية.
المدنية هي هدم مفاهيم قسمتنا و استرجاع و بناء لقيمنا و اخلاقنا الضاعت و اتغيرت على مدى سنين من حكم العصى.
المدنية هي تغيير مفاهيم العسكر الماسك البندقية و العصاية، الفاكر ان القمع و الاساليب الامنية هي الطريق لحل مشاكلنا من السرقة، الفقر، الغلاء و شح الوظائف إلى الصحة، التعليم و الثقافة.
يا عسكر ما بحق ليك تضربني.
يا عسكر ما بحق ليك تقص شعري.
يا عسكر ما بحق ليك تتحرش بي.
يا عسكر ما بحق ليك تسرقني.
يا عسكر ما بحق ليك تقتلني.
يا عسكر انكسر بندقيتك و عصاك.
حلمنا سودان بيوتنا فيه فاتحه لبعض. سودان فيه نحب بعض، نعرف بعض من جنوبنا لغربنا، شمالنا لشرقنا. سودان نبني حبنا قبل حيطنا. سودان روح كل شاب/ة حالم/ة بي مستقبل غالية ما بتتعوض.
ندعوكم نحن راستات السودان لموكب حب، تعافي و مقاومة. نقطة إنطلاقة موكبنا في يوم ١٠ يناير هي مركز شباب الربيع في العباسية، أمدرمان.
* الساعة ١ – مخاطبة تعريفية
* الساعة ١:٣٠ – فعالية موسيقية ثورية
* الساعة ٢:٣٠ – موكب لبيت الشهيد الروسي و الشهيد حسام ينتهي في بيت الشهيد بيبو.
راستات السودان
٩ يناير ٢٠٢٢
#الراستا_مابموت
#لاتفاوض_لاشراكة_لاشرعية
