الحكي نص في السؤال ونص في المفاهيم.. منو القال اللون الأسود ما جميل

ونسة (صورة وصوت)..
الحكي نص في السؤال ونص في المفاهيم..
منو القال (اللون الأسود ما جميل).
رؤية/ هيثم الطيب

كنت بدرس مناهج نقد في الفنون الأدائية،المشرف كان عندو رؤية إنو الحكي طريق صناعة الممثل الناجح،وأي ممثل عايز ينجح لازم يتمرن على الحكي بشكل علمي ومنهجي،بالتأكيد في جزء من الطلاب ليهم رأي مختلف،لكن قلنا نشتغل تجريب في النقطة دي،كمشاريع نهاية عام دراسي..
كل طالب وطالبة كان مطلوب منو صياغة منهج يشتغل على تكوين الحكي كفكرة تمثيلية كاملة..
أنا:-
حاولت اعمل شيء مختلف،في كيف تكون عندك مفردات جديدة وفكرة جديدة بعد كل مرحلة حكي،يعني كيف نصنع حكي منساب فيهو قيمة تجديدية تشتغل على تكوين فرضية الحكي كصناعة تمثيلية..
قدمت ورقتي للنقاش وكمقدمة قلت،بالعامية السودانية،عشان كنت عايز اعمل إشارة لثراء القيمة التعبيرية وقيمة الحكي بيها كشكل مختلف في عالمنا العربي والإفريقي..
وكانت الرؤية:-
عايزين نعمل حكي ثنائي مسرحي يناقش فكرة (منو القال اللون الأسود غير جميل)،بكل الأبعاد تأريخية،إجتماعية،نفسية،تربوية،ثقافية،
‌وفكرة زي تفتح مسارات حكي مختلف عشان هي نظرية جمالية عند بعضنا،وفهم عند بعضنا ،وكمان في نظرة مرتبطة بالأبعاد التكوينية للعقل وتقييم اللون الأسود،وجدانيا برضو في مشكلة تحريك رفض ليهو كلون،وفي رفض باطني محدد متصل بإنو لازم تعمل عملية انتقال إلى اللون الأبيض كفلسفة جمالية،القصة دي كانت عايزة إجتهادات كبيرة،وشغل تجهيزات حقيقي،لأنها. حا تلمس عصب حي راسخ في العقلية العربية،وده تشكيل الحكي بافتراض مني لانو الزول البحكي لازم يقرأ ويطلع ويجهز نفسو معرفيا وكمان نفسيا لانك حا تكون في ميزان تفصيلي وانت بتمارس الحكي،والمستمعين ليك مختلفين ومتحفزين،ودي النقطة المفيدة في القصة كلها تشكيل وعي تحفيزي وانت قاعد تحكي،كإشارة تمثيلية ومسرحية..
‌

كنت بقصد من مشروع نهاية العام الدراسي لي إني عايز أعمل تلخيص لمفاهيم حول اللون الأسود،وانو الحكي كفن أدائي ممكن نعمل ليهو قيمة تطويرية تحفيزية ،وندخل بيهو اطار جديد غير الاطار الخاص بالأطفال،نقلة الحكي كمشروع مسرحي متكامل تحتاج لصياغة جديدة لفلسفة كيف نعمل حركة حكي معرفية،يعني نقل ونستنا العادية لاطار حكي مستحدث ونمط معرفة كمان،ده يتحقق في حالة عمل نقلة كاملة في مفهوم ليه نحنا بنحكي،وكيف بنحكي،ومحتاجين لأي أدوات عشان الحكي يكون داعم ثقافي مجتمعي وحقيقي،العالم يشتغل على تحريك الفنون المحلية لي صور جديدة يستفيد منها في تشكيل معارف ومعرفية كمان،نحنا ممكن نعمل كدة،الحكي ده جزء من ثقافتنا وتراثنا،بس كيف نشتغل عليهو عشان نستفيد منو في ترسيخ حواراتنا،نصيغ الزول الحكاي عشان نصنع الناس المستمعين بجد ودي عصب الفائدة كلها..

‌تصنع الحكي عشان ينتج ليك شعب مستمع للآخر،الحكي ذاتو كثقافة تعليم مفترض ينتج شعب بعرف يستمع،ومشينا بالتجربة والمشروع،وحكي اللون الأسود قديم وحديث،نفسي وإجتماعي،ثقافي وتعليمي،تربوي ومنهجي..
‌جدلية نقاش الناس حول اللون الأسود صنعت رؤى مختلفة،وأصوات من كل الزوايا،وإشارات إكتشاف للثقافة الخاصة بكل شعب في النقطة دي..

‌كانت تجربة حكي حقيقي،اشتغل على فتح كل الزوايا،بلا خوف وبمعرفة..
‌الحكي يرفض الخوف كان عنوان مقترح المشروع الدراسي..