قررت تمشي تفوت متين… دكتور محمد النتيفة

أنا لله وأنا اليه راجعون له رحمة والمغفرة

قررت تمشي  تفوت متين… محمد النتيفة

بالله يا عم حسين
قررت تمشي
تفوت متين
ما لسه
في الاداب دروب
مخضرة بالشوق
والحنين
تضحك وكت تضحك تجيك
في كل ساعة
وكل حين
(ما بكتل الريل والغزال
يا غالي
لو بتشوفو عين)
يا كل ما الاحلام تجف
تديها من ذوقك
غصين
تخضر الساحات معاك
والذكرى
والشوق والسنين
بالله فجأة بلا وداع
رحلت
يا زول يا حنين
ظنيت قليبك ما احتمل
زمن الهلاويس
والكمين
زمن الورود
ترقد تموت
زمن الجدى المفرود حزين
زمن البيوت
مطحونه هم
مليانة بالاسى والانين
زمن اللا عدالة ولا رضا
زمن عز فيهو
الاكسجين
الدنيا تنده يا قتال
ونحن ننده
يا حسين
ياااا رب حسين
تتولاه يا ارحم رحيم
زولا سمح بلحيل
وزين