ذاكرك ما أحلاها.. بدر الدين العتّاق
ذكراك ما احلاها
شعر : بدر الدين العتاق
أفرد جناحك يا طاير
وضم الليل نحيب
وغرد من غير ملام
وشيل همومك معايا
ما أصله الحب نشيد
تلقاه بالشوق هتف
بس من غير كلام
مستني الريد يقيف
حالنا حال والدنيا طيف
في جواه الزول يعاين
بالله نشوفه كيف
شيل في دنياك حالي
والليل يهدهد في الحروف
وطير أبعد مكان
وشوف إيه الظروف
ليه سكت الغرام
ليه لي عذاب وريد
ياهو المكتوب علينا
والألم يروي الجروف
الجروف الطالعة من نبض المحنة
لا بيها ارتوت المشاعر
لا بيها غنت قصيد
ولا ليها خطرن ببالي
ولا فيها كفاية دلك
ولا عنها تاهت تقيف
يا غنوة محنة باكية
ويا شيل ريدتنا حالمة
يا ريت من حبك روينا
ويا سيدنا خلينا ونشوف
نشوف صورة منك
أو كلمة عنك
أو بسمة فيك
أو غاية بيك
أو نظرة ليك
عشان آها تجرح قليبنا بعدك
وفي خاطرنا طيف
ولحظة واحدة من طيفك سهرنا
وضمينا الليل نحيب
قول للبنية الساكنة جوة
السكون
والحاضنة نبض المعاني
والراسمة شكل الظنون
وشايلة الريد حروف
قوليها شان ترتاح من الهزيع
ومن سهر الجفون
ومن وجع العيون
قوليها
قوليها الشوق لحظة نشيدي يصبح عليل
يتاتي الهم ولف
ويفرد لحضنك جناح
ويسمع همسك عشق
انا ذاتي فيك
وروحي بيك
وحياتي ليك
يا ذكراها ما احلاها دنك
يا حياة دنيتنا فنك
سرحان أفتش نغم
وانظم رسايلك وشاح
ما الكون هجع
ضمانا في وسنة نحيب
وشقينا جد
وسافرنا مد
وطوينا حد
ولقينا كد
وحلمنا كترة حلم
يا طير أفرد جناحك
وضم البنية راحت
ما الدنيا لحظة عشم
نلقاها وين
تلقانا وين
نشوفها كيف
الكانت تغني وتغني وتغني
أنا والشوق والمسافات البعيدة
أنت والكون الفسيح صداها ونحيبها
والجرح والاهات نشيدة
ضمانا خوف
خاطرا يحن
وحالا يجن
نستنى كيف
والليل هجد
يكفكف في النهار
ونعود تاني
تاني تاني
نعود تاني
والنحيب في حالنا ظنك
أفرد جناحك يا طائر
ما الليل والهجعة والسكون
أجمل حقيقة
