حضرنا ولم نجدكم منظمة مراقي للتنمية البشرية وشركة الشمال لإنتاج الأسمنت)

حضرنا ولم نجدكم (منظمة مراقي للتنمية البشرية وشركة الشمال لإنتاج الأسمنت)

عطبرة : عبدالرحمن الكيال

سأحاول جاهدا أن أكتب هذه المرة باللغة الدارجة السودانية ، يعني بي لهجة أهلنا البسيطة البتشبه بساطتن وطيبتن وعاداتن وتقاليدن السمحة .

فى بعض القري والمناطق الريفية ، بتلقي كتير من أبواب البيوت مشخبطين فيها بي فحم أو طباشيرة أو قلم عبارة (حضرنا ولم نجدكم) – التوقيع: فلان الفلاني ، أو إذا كان البيت فاتح – ودي عادة عند كتير جدا من أهل الارياف – البيوت بتكون مفتوحة وحتي في بيوت مافيها باب شارع يلا أهلها لما يكونو مافيشين ويجي زول عاقبهم بيخت ليهم الكرسي فوق سرير فى الحوش أو يترك ليهو أي علامة توريهم انو فى زول جاء بي وراهم ومالقاهم .
المقدمة دي كلها انا جبتها عشان ادخل فى موضوع العنوان (حضرنا ولم نجدكم – التوقيع :(منظمة مراقي للتنمية البشرية# وشركة اسمنت الشمال#) ، ومن باب من لايشكر الناس لايشكر الله وإن شاء الله ذي مابيقولو اهلنا يوم شكرهن مايجي ، الناس ديل انا كنت برا البيت وجاني اتصال تيييت تيييت فتحت ألوووو جاني صوت شاب مهذب إتضح فيما بعد إنو إسمو النابغ الأمين ، قال لي سلام عليكم استاذ عبدالرحمن؟ قلت ليهو نعم معاي منو ماعرفتك؟ قال لي نعم الله عليك انا من منظمة مراقي للتنمية البشرية وعايزين نجيب ليك حصتك من الدقيق بالتعاون مع شركة الشمال لإنتاج الأسمنت .

https://maragi.org/ar/home/
قاطعتو قلت ليهو والله للأسف انا برا البيت قال لي مامشكلة شوف ليك اي زول تثق فيهو واديهو رقمي يتواصل معاي يستلم ليك .
يلا إنتبهت إنو فى واحد جاري بيكون موجود اتصلت عليهو واديتو رقم النابغ ، يتواصل معاهو وقال لي ابشر .

رجعت للنابغ ، قلت ليهو : فى جاري حيجي يقابلك ويستلم منك ووريتو إنو جاري دا برضو فى كشف الحصر كان ماإتسجل قال لي بننزل ليهو حصتو معاك إن شاء الله .
أها الحمد لله الناس ديل اوفوا بماعاهدوا وصدقوا بما قالوا وادوا الامانة وحصتي وبالزيادة جاتني معزز مكرم عشان كدا قلت اكتب الكلمات البسيطة دي فى حقهم عسي ولعل توفيهم جزء بسيط من حقهم وجهدهم ومش لأنو جابو لي دقيق وبس لا والله قليلة وكتيرة رايحة والحمد لله الأمور ماشة بفضل الله الرزاق الكريم لكن الواحد لما يلقي نفسو إنو مامع المجتمع العايش فيهو بيشعر بي شيء فى نفسو عشان كدا الحيت إني أتواصل مع ناس منظمة مراقي الخيرية وأضم إسمي لي الكشوفات عشان اكون مع الناس وجزاهم الله خيرا على طولة بالهم وسعة صدرهم وإستجابتهم الكريمة والسريعة وسبحان الله والله الأخوان والجيران ماقصرو برضو لما سمعوا بي إنو إسمي ماكان فى الكشوفات الإتسجلت ضوقوني من حصتهم بتاعت الدقيق ويمكن أكون لميت دقيق اكتر من شوال وربنا يديم الخوة والمحبة والطيبة وحسن الجيرة .
يلا أنا متأكد إنو قد يكون فى اسماء سقطت فى الكشوفات الاولية فى عدد كبير من المدن والقري ، وإن شاء الله بتتعالج وكمان متأكد مية فى المية إنو ناس المنظمة ديل أدو ناس ذي حالتي دي لأنهم مصرين إنو يصلو اي اسرة ويدوها حقها فى الدقيق واصالة عن نفسي ونيابة عنهم اقول ليهم جزاكم الله خيرا
التوقيع : عبدالرحمن الكيال