الجعيص العكليتة.. بدر الدين العتاق

• الجعيص العكليتة

شعر : بدر الدين العتاق

الزول الجعيص الراكب السوميتة
الراجل الكلس دوام عكليتة
فرتاق الضلوع اليابسة فليتة
دراع الحديد الشبك كبريتة
**
قالوا الرياسة جاتلوا هدية
لزام التقيل حراريسه مية
وكتين الحارة يلبس الطاقية
خرات اليبوس عدموا البلية
**
حالف يمين خاين بلده هو
يسمو ما يضوقها قدحة شو
كتاحة غبيش حمرانة ضو
عشرانة قبيل عشراته لو
**
جبار خواطر ليها عديلة
ركاب سروج فيها مقيلة
كندك رجال عرفوها تقيلة
دقر نقوا للعاداه قليلة
***
كلم الخواجة البسوي الني
تريان عبوس يتحكر البامبي
ولي وداعة الله خلاهم صي
قوقو حارسين البلاد والحي
***
التور الجعر ما هو سعية
قلب الهوبة في الراكوبة عنية
براق الرعود ضاوي سمية
ختاها قرض والعهود مرعية
**
قاهر صمد المشيهن كدو
ات الرخ نزل صقر الجو
الختر ختوك شمعة ضو
الموت ما بهمه حتى ولو
***
طربان حير الواطة مسيكا
جهجه بلادم ولي أمريكا
وداها عديل كمل الكيكا
نتاف ريوش اداهم سيكا
***
عشا البايتات شن بتسو
سياد كرم حرمالوا الكو
طربيق الدواس والخو
هديك النقعة كلولو لو
****
اسدا زميم وفي كدايتو بكر
برم خيدرانتو جاب كلامه المر
سم الساعة ترياق اللئيم الحر
بدر الدين شعر للمخاصمينوا الضر
****
وكتين الدواس شنقل المزيونة
مزروب الفطيس
كمل المعجونة
وزغردت بت الكديس أمونة
قالوا عبرحيم دورلوا طاحونة
****
سلام للجعيص السوميتة ركوبوا
الراجل العكليتة الهموموا حروبوا
كايس السلامة والمعالي دروبوا
فرتاق الجموع الخموا خبوبوا

****
بدر الدين العتاق
القاهرة