الشايقي محللًا سياسيًا بارعًا
الشايقي محللًا سياسيًا بارعًا
بقلم: جعفر عباس
كتبت هنا قبل عشرة أيام عن الشايقي العبقري الذي لجأ إليه ولده الراغب في الزواج من حسناء يتيمة (الأب) تهافت الخطاب لطلب يدها ولكن أمها رفضتهم الواحد تلو الآخر لأنهم عجزوا عن الوفاء بشرطها لتزويج بنتها وهو ان يكون المهر 5 مليار جنيه لا تنقص مليما، وكانت مشكلة الولد أنه لا يملك سوى 3 مليارات، فما كان من الأب إلا ان اصطحبه الى أم البنت، وقال لها: هاك مليار مهرا من ولدي لبنتك، فضحكت الأم ساخرة: هههاااي، فواصل الشايقي: وهذه مليار مني مهرا لك، فابتسمت الأم في حياء وقالت “على بركة الله”، ولما سألها الجيران كيف التنازل عن المهر المحدد ب 5 مليارات، ردت: سعر الجملة يختلف عن سعر القطاعي، ولما سال الشاب أباه عن المليار الثالث الباقي، قال له الاب: نرضي به امك، وقلت إن ذلك يؤكد أننا لسنا بحاجة الى وسطاء دوليين او أفارقة لحل مشكلتنا وأن الشايقية أصحاب مهارات في إدارة وحل الأزمات، وأن “ود شقدي” أحسن من فولكر.
وإليكم اليوم ما يثبت ان الشايقية مؤهلون لتلك المهمة، لأنهم يتسمون بالوعي السياسي، فقبل حين من الزمان صفع شاب الرئيس الفرنسي ايمانويل ماكرون أثناء قيامه بجولة انتخابية، فكان رد فعل ود شقدي: ضاربو كف في شنو؟! عاد آآ يابا جيت راجع بيتك بعد شمس تقلي الحبة لقيت الكهرباء قاطعي.. . نان وقفت في صف العيش ثلاث ساعات.. . نان آآبوي جربت تكابس في المواصلات وبعد ده تركب شماعه…. كافتو في شنو… مالك فتحت الماسورة لقيتا قاطعي…. مشيت الصيدلية شايل قروشك لقيت الدواء ما في؟ وقفت في صف البنزين يومين .. كافتو لي شنو…. كان مو قدنفه منك وقلة أدب. جيت راجع أهلك مرتك قالتلك أنبوبة الغاز فضت وبقيت تزازي من مكان لي مكان. والله ياهو الفضل. اكان معانا هنا كنت سويت شنو.؟؟؟؟!!!! والله ياها السمكة الشبعت ومرقت من البحر.. نقول مالك َ؟؟؟ عليك دين من سيد الدكان واللبن وسيد الخدار.؟؟! ياربي فتحت عيونك من الصباح لقيت ولادك الماشين الجامعة والمدارس حارسنك لي حق الفطور والمواصلات. تقول مالك، الملي التاخدك. راجياك ضحيى ولا سمايه؟ والله ياهو الفضل. حايم من بار لي بار تشرب في البيرة الساقطي ومن ملهي لي ملهي. يسعلك الله البخليك تكفتو شنو؟ نبذك قالك شذاذ آفاق زي ناسنا؟ ولا قال ليك سنعبر وما عبر؟ العبرة التخنقك. كافتو مالك؟؟؟ الناقصك شنو؟؟ من الضبان والبعوضه الكرهتك عيشتك ولا تصبح عليك الواطه تلقي الاسعار زايدي والدولار طاير. تطير عيشتك؟ تاكل في الرغيف الابيض ده ويجي عليك تكفتو . يكفتك الشيطان آآ يابا.
ود شقدي وبس
